ئه‌گه‌ر ریمۆت کۆنتڕۆل نه‌با، چاره‌ى ئێمه‌ چیبوو؟؟

هه‌موو ته‌له‌ڤزیۆنه‌کانى ئه‌م سه‌رده‌مه‌، شوکر ئامێرێکى بچووکیان له‌گه‌ڵدایه‌، بۆ ئه‌وه‌ى ئێمه‌ى بینه‌رى به‌رنامه‌کانى ته‌له‌ڤزیۆن، هه‌رکاتێ ویستمان، که‌ناڵه‌کان بگۆڕین، یا ته‌له‌ڤزیۆنه‌که‌ بکوژێنینه‌وه‌، یا خود ده‌نگ که‌مو زیاد بکه‌ین.
خوا خێرى ئه‌و که‌سه‌، یا ئه‌و کۆمپانیایه‌ بنووسێت، که‌ ئه‌م ئامێره‌ى داهێنا، چونکه‌ کاره‌کانى یه‌کجار زۆر ئاسان کردووه‌.
به‌ڵام له‌ کوردستانى خۆمان، ئه‌م ئامێره‌ مرۆڤ وه‌ڕه‌ز ده‌کات. نه‌ک له‌به‌ر ئه‌وه‌ى خۆى شتێکى ره‌زاقورس و ناشیرین بێت، به‌ڵکوو له‌به‌ر ئه‌وه‌ى که‌ هه‌رده‌م ده‌بێت، له‌ناو ده‌ستت دابێت و جێگه‌ی ته‌سبیحى گرتووه‌ته‌وه‌.
من بڕوا ناکه‌م، که‌ ئه‌و کۆمپانیایه‌ى ریمۆت کۆنتڕۆل بۆ ته‌له‌ڤزیۆنه‌کان دروست ده‌کات، حیسابى بۆ ئه‌و هه‌موو کاره‌ کردبێت، که‌ له‌ کوردستان پێی ده‌کرێت، چونکه‌ هه‌ر ئه‌و کۆمپانیایانه‌، ئاگادارى ئه‌و راستییه‌ن، که‌ هه‌موو ده‌زگایه‌کى په‌خشى ته‌له‌ڤزیۆنى، ئامێرێکى به‌ ناوى میکسه‌ر هه‌یه‌، که‌ کۆنتڕۆلى ئه‌و ده‌نگه‌ ده‌کات، که‌ له‌ ده‌زگایه‌که‌ په‌خش ده‌کرێت.
ئه‌م ئامێره‌، له‌ هه‌ر شوێنێک پێویست بوو، ده‌نگ زیاد ده‌کات و ئه‌گه‌ریش زیاد بوو، یه‌کسه‌ر که‌مى ده‌کاته‌وه‌. تا راده‌یه‌ک، که‌ به‌رز و نزمبوونى له‌ ناکاوى ده‌نگى که‌ناڵێکى ته‌له‌ڤزیۆنى، به‌ هه‌ڵه‌یه‌کى ته‌کنیکى زۆر ناشیرین له‌ قه‌ڵه‌م ده‌درێت و ره‌خنه‌ى توندیشى ئاراسته‌ ده‌کرێت.
به‌ڵام به‌داخه‌وه‌، له‌ کوردستانى خۆمان، ته‌له‌ڤزیۆنه‌کان، به‌بێ ئه‌وه‌ى ره‌چاوى حاڵ و وه‌زعى بینه‌ر بکه‌ن و بڕێکیش له‌ هزرى ناوبانگى ده‌زگاکه‌ى خۆیان بن، ئامێرى میکسه‌رى ده‌نگیان به‌ ته‌واوى به‌ لایه‌که‌وه‌ ناوه‌و بینه‌ران ده‌بێت له‌ ماڵه‌وه‌، ئه‌رکى کارمه‌ندى ته‌له‌ڤزیۆنه‌کان جێبه‌جێ بکه‌ن و ده‌مو ساعه‌ت هه‌ر ڤۆلیۆمه‌که‌ به‌رز و نزم که‌نه‌وه‌.
بۆیه‌ش زۆرجار له‌ ماڵه‌وه‌، بیر له‌وه‌ ده‌که‌مه‌وه‌، که‌ ئه‌گه‌ر ریمۆت کۆنتڕۆل نه‌بوایه‌، ئێمه‌ى بینه‌رى ته‌له‌ڤزیۆنه‌کانى کوردى، چاره‌مان چی بوو؟؟!!